«Большие танцы» күрэх үҥкүү түһүлгэтин тэрийдэ

Аан дойдутааҕы үҥкүү күнүн көрсө муус устар 29 күнүгэр Бөтүҥ нэһилиэгин тэрилтэлэрэ «Сайдыс-2023» култуурунай-спортивнай эстафета чэрчитинэн төрдүс төгүлүн ыытыллар «Большие танцы» үҥкүү күрэҕэр күөн көрүстүлэр.Үҥкүүнү сэнээрээчилэр, таптааччылар сааланы толору тоҕуоруһа муһуннулар. Сылаас ытыстарын тыаһынан, ыһыыларынан-хаһыыларынан күрэх кыттааччыларыгар элбэх эрэли, үөрүүнү-көтүүнү эбэн биэрдилэр.

Таппыты-сыыспыты таба көрөн сыаналыыр дьүүллүүр сүбэнэн Саха Өрөспүүбүлүкэтин култууратын туйгуна, Чапчылҕаннааҕы култуура дьиэтин хореограва Сангима Васильевна Романова, Амматааҕы Ольга Иванова-Сидоркеевич аатынан айар сайдыы киинин үрдүкү категориялаах эбии үөрэхтээһин хореограф-уһуйааччыта Мария Иннокентьевна Слепцова, Саха Өрөспүүбүлүкэтин ыччат политикатын туйгуна «Махтал» народнай үҥкүү коллективын салайааччыта, Константин Семенович Попов үлэлээтилэр.

Уопсайа 5 тэрилтэ коллектива кыттыыны ылла. Күрэх икки түһүмэҕинэн ыытылынна. Ол курдук, маҥнайгы пааранан үҥкүү түһүмэҕэр Николай Егорович Иванов аатынан Бөтүҥ орто оскуола логопеда Долгууна Ларионова уонна география учуутала Андрей Гоголев «Казахскай үҥкүүнэн» «Көрөөччү биһирэбилэ» номинацияны ыллылар, «Мичээр» оҕо сайдар киинин уонна дьиэлэри, тэрилтэлэри сылааһынан хааччыйар олох-дьаһах коммунальнай хаһаайыстыба коллективтарыттан Мария Жиркова, Николай Гурьев «Индийскэй үҥкүүнэн» үһүс миэстэ, олохтоох дьаһалта биир тутаах үлэһитэ уонна Владимир Захарович Неверев аатынан элбэх хайысхалаах адаптивнай саала үлэһитэ Варвара, Семен Степановтар «Ирландскай үҥкүүнэн» иккис миэстэ, СӨ Судаарыстыбаннай хааһынатын тэрилтэтэ «СӨ» үлэҕэ уонна социальнай сайдыыга министерствотын Амматааҕы нэһилиэнньэ социальнай көмүскэлин кэлим киинин колективыттан Татьяна Лобанова, Дмитрий Григорьев «Смуглянка» үҥкүүнэн маҥнайгы миэстэ буолан үөрүүлэрэ үрдээтэ.

Иккис «Россия норуоттарын үҥкүүтэ» түһүмэххэ С. Я Левин аатынан норуот айымньытын киинин, Владимир Неверев аатынан элбэх хайысхалаах адаптивнай саала коллективтарын кэрэ аҥардара «Танец хоровод» үҥкүүнэн «Көрөөччү биһирэбилэ» номинацияны ыллылар, «Мичээр» оҕо сайдар киинин уонна дьиэлэри, тэрилтэлэри сылааһынан хааччыйар олох-дьаһах коммунальнай хаһаайыстыба коллективын «Таджикскай үҥкүүнэн» үһүс миэстэҕэ, Николай Егорович Иванов аатынан Бөтүҥ орто оскуолатын кэскиллээх эдэр учууталлара “Хотугу үҥкүүнэн” иккис миэстэҕэ, СӨ Судаарыстыбаннай хааһынатын тэрилтэтэ «СӨ» үлэҕэ уонна социальнай сайдыыга министерствотын Амматааҕы нэһилиэнньэ социальнай көмүскэлин кэлим киинин ол эбэтэр народнай аатынан “Күөх ыллык” коллектива «Маленькая юрта» бурятскай үҥкүүнэн маҥнайгы миэстэҕэ таҕыстылар.

Аан дойдутааҕы үҥкүү күнүнэн «Махтал» норуодунай үҥкүү коллектива, «Талаана» үһүс көлүөнэ үҥкүү коллектива, Чапчылҕаннааҕы “Кырдал” үҥкүү коллектива Бөтүҥ нэһилиэгин дьонун-сэргэтин эҕэрдэлээтилэр.

Үҥкүү кэрэ киэһэтэ көрөөччүлэри абылаата, дьол кыымын ыста, этэргэ дылы, биир тыынынан барда.