Бөтүҥҥэ оҕо көмүскэлин күнэ

Бэс ыйын 1 күнэ Бөтүҥ нэһилиэгин оҕолоругар бэрт сэргэхтик ааста. Оҕо көмүскэлин күнүн Амма эбэ үрдүгэр турар, саҥа площадкаҕа бэлиэтээтибит.

Бу күн нэһилиэкпит оҕолоро эҕэрдэ кэнсиэр көрдөрдүлэр: «Мичээр» уһуйаан бэлэмнэнии уонна улахан бөлөҕүн оҕолоро сэргэх ырыаларынан, «Тапталлаах Бөтүҥүм» хоһоонунан уонна аэробика үҥкүүнэн бар дьоннорун эҕэрдэлээтилэр, сал. Е.С. Никитина. Н.Е. Иванов аатынан Бөтүҥ орто оскуолатын үөрэнээччилэрэ, ырыа куруһуогар дьарыктанар оҕолор ылбаҕай ырыаларын бэлэх ууннулар, сал. Л.В. Лобанова. «Төлөн» оҕо театральнай коллектива бэһиэлэй инсценировкаларынан дьону үөртүлэр, сал. С.Г. Гурьева. «Махтал» норуодунай үҥкүү бөлөҕө тэтимнээх үҥкүүнэн көрөөччү кутун тутта, сал. К.С. Попов.

Эҕэрдэ кэнсиэр кэннэ Степан Левин аатынан НАК үлэһиттэрэ М.С. Кырбасова, А.Ф. Яковлева, «Матери России» түмсүү салайааччыта А.В. Егорова оҥорбут минньигэс бисквитын кремынан, араас фруктанан киэргэтэннэр кэлбит оҕолору, улахан дьону күндүлээтилэр.

Дьэ ол кэннэ, дьахталлар сэбиэттэрин түмсүүтэ, сал. Т.Г. Сутакова, «Талаана» 3-с көлүөнэ түмсүүтэ, сал. С.А. Никитина уонна бэтэрээннэр сэбиээттэрин тумсуутэ, сал. Т.П. Давыдова оҕолорго араас аттракционнары оонньоттулар. Бириистэри «Харысхан», «Чаран», «Центр», «Эйгэ» маҕаһыыннар спонсордаан, оҕолор, дьиэлэригэр бэртээхэй бириистэри тутан үөрэн-көтөн бардылар.

«Ай-санаа» эдэр ийэлэр түмсүүлэрэ кыргыттарга аналлаах «Сказочный ободок» күрэҕэр, уопсайа 9 кэрэчээн кыргыттар илиинэн оҥоһуллубут ободуоктаах кыттан, дьон сэҥээриитин, хайҕабылын ыллылар.

Эдэр ыччат уонна аҕа түмсүүтэ көмөлөөн, уолаттарга «Юный велосипедист» күрэх ыыттылар. 2 сүһүөҕүнэн арааран, араас моһоллору аһардан кыайыылаахтары наҕараадалаатылар.

Оҕо көмүскэлигэр аналлаах күммүт уоттаах-күөстээх дискотеканан түмүктэннэ.