Бөтүҥ нэһилиэгин кэрэ аҥардарын икки ардыларыгар «Многоборье» күрэҕэ ыытылынна

Бүгүн, кулун тутар 6 күнүгэр, Бөтүҥ нэһилиэгэр Аан дойдутааҕы дьахталлар күннэригэр аналлаах үөрүүлээх уонна сэргэх тэрээһин буолла. Бөтүҥ нэһилиэгин түөлбэлэрин кэрэ аҥардара «Многоборье» күрэҕэр күүстэрин, дьоҕурдарын уонна сатабылларын тэҥнэһэн күөн көрүстүлэр.

Тэрээһиҥҥэ «Бөтүҥ нэһилиэгэ» тыа сирин түөлбэтин дьаһалтатын сүрүннүүр исписэлииһэ Семен Тихонов мустубут күн күбэй ийэлэргэ, эйэҕэс эбээлэргэ, сайаҕас эдьиийдэргэ, кындыа кыталык кыргыттарга баҕа санаалатын тиэрдэн, эҕэрдэ тылын эттэ. Ырыа куттаах уолаттарбыт Амматааҕы Федот Потапов аатынан норуот айымньытын дьиэтин салайааччыта Николай Пухов уонна Олег Егоров бэйэлэрин уран тыыннаах ырыаларын бэлэх ууннулар.

Бу киэһэ Бөтүҥ нэһилиэгин эр дьонноро кэрэ аҥардарга анаан бырааһынньыктааҕы сандалы остуолу тардан, минньигэс туордунан күндүлээтилэр. Эр дьон бу көхтөөх, эйэҕэс быһыылара дьахталларбыт сүргэлэрин өрө көтөхтө, үөрүүлэрин үрдэттэ.

Күрэх күүстээх киирсиитэ олус долгутуулаахтык ааста. Кэрэ аҥардарбыт сыал ытыытыгар, ох саанан ытыыга, тенниска, дартска, шашкаҕа уонна корнхолга бэйэлэрин дьоҕурдарын көрдөрдүлэр. Тэрээһин кылаабынай судьуйатынан Бөтүҥ нэһилиэгин спордун инструктора Александр Артемьев үлэлээтэ.

Олус көхтөөх күрэс кэнниттэн миэстэлэр маннык тыырылыннылар:
• 1-кы миэстэ – Галина Яковлева салайааччылаах «Арчы» түөлбэ;
• 2-с миэстэ – Туйаара Давыдова салайааччылаах «Сомоҕо» түөлбэ;
• 3-с миэстэ – Розалия Иванова салайааччылаах «Ситим» түөлбэ;
• 4-с миэстэ – Александра Егорова салайааччылаах «Илин» түөлбэ.

Бары кыттааччыларга, түөлбэ салайааччыларыгар махталбытын тиэрдэбит!

— — —

Күндү кэрэ аҥардарбыт!

Эһигини айылҕа уһуктар, күн уота сылыйар маҥнайгы сааскы бырааһынньыгынан — Аан дойдутааҕы дьахталлар күннэринэн итиитик-истиҥник эҕэрдэлиибит! Баҕарабыт эһиэхэ сандал саас курдук сайаҕас санааны , саха алмааһыныы кытаанах доруобуйаны! Сааскы сибэккилии чэчирээн, чэгиэн-чэбдик туруктанан, күн аайы дьолтон сандаара, тапталга угуттана, алгыска сыдьаайа сылдьыҥ! Дьиэ кэргэҥҥитигэр — эйэ-дэмнээх олох дэлэйдин, оҕо-аймах үөрүүтэ үксээтин!