«Төлөн» оҕо тыйаатыра «Туос Мааскы» күрэҕэр

Кулун тутар 27-28 күннэригэр Майатааҕы Д.Ф. Ходулов аатынан норуот айымньытын дьиэтигэр 27-с төгүлүн ыытыллар «ТУОС МААСКЫ» аһаҕас театральнай бэстибээл-күрэс буолан ааста. Бу бэстибээл-күрэскэ Сахабыт сирин араас муннуктарыттан театральнай кэллэктииптэр кэлэн уопсайа 5 бөлөҕүнэн сыанаҕа таҕыстылар. Бэстибээл-күрэс иккис күнүгэр 3 бөлөх – орто кылаас, 4 бөлөх – үрдүкү кылаас уонна 5 бөлөх – улахан дьон уопсайа 19 театральнай коллективтар кыттыыны ыллылар. Бу күн Дьүүллүүр сүбэҕэ үлэлээтилэр:
— Мэҥэ Хаҥалас улууһун култууратын салалтатын аатыттан Терентьева Мария Серафимовна – Майатааҕы Аркадий Новиков «Көөчөөн көрө» норуодунай тэттик тыйаатырын режиссера;
Адамова Саргылана Саввична, Саха Өрөспүүбүлүкэтин култуураҕа уонна духуобунай сайдыыга министиэристибэтин «Геокультурнай сайдыы института» судаарыстыбаннай тэрилтэ сүрүннүүр специалиһа, Российскай федерация театральнай деятеллэрин сойууһун чилиэнэ, СӨ култууратын үтүөлээх үлэһитэ;
Дьүүллүүр сүбэ бэрэссэдээтэлэ — Захаров Алексей Константинович — Өрөспүүбүлүкэтээҕи Норуот айымньытын дьиэтин уус-уран салайааччыта, Саха сирин норуодунай тыйаатырдар куратордара, СӨ култууратын туйгуна.

Биһиги нэһилиэктэн С.Я. Левин аатынан норуот айымньытын киинин иһинэн үлэлиир Марианна Семеновна Кырбасова салайааччылаах «Төлөн» оҕо тыйаатыра бэстибээл-күрэс иккис күнүгэр Устин Нохсоороп «Дыырай Бэргэн» олоҥхотун туруоран 3 бөлөххө киирэн кыттыыны ылан кэллэ.

«Туос мааскы» күрэххэ биһиги кэллэктиипкэ «Төрүт норуот айымньытын үйэтитии» анал аат иҥэрбиттэр. Күрэххэ Олоҥхону биһиги эрэ кэллэктиип көрдөрдүбүт, дьүүллүүр сүбэ бэйэҕит түөлбэҕит олоҥхотун, култууратын үйэтитэ, көрдөрө сылдьаргыт олус наадалаах диэн хайҕаатылар, абааһылар оруолларын оҕолор олус үчүгэйдик биэрдилэр диэн бэлиэтээтилэр.
Оҕолорум наһаа маладьыстар, кинилэр бары биир тыыннаах, биир санаалаах буолан, сахалыы күүстээх дорҕоону иҥэрэн, олоҥхо киэҥ эйгэтин арыйдылар. Хас биирдии оҕо бэйэтин геройун ис хоһоонун, майгытын-сигилитин бэркэ диэн сэрэйэн, оонньоон көрдөрдө.
Оҕолор куоластара — олоҥхо тылыгар дьүөрэлэһэн, сыананы тыыннаан, көрөөччүлэри былыргы кэмҥэ ыҥырдылар.
Олоҥхо ырыатын-тойугун Саина Попова үөрэттэ, үҥкүүлэри Константин Попов туруорда.
Түгэнинэн туһанан, Олоҥхо туруоруллуутугар өйөбүл буолар С.Я. Левин аатынан НАК коллективыгар, куруук күүс-көмө, өйөбүл буолар төрөппүттэрбитигэр, сыыдам сырыылаах суоппардабытыгар Дмитрий Лобановка, Афанасий Максимовка истиҥ махталбытын оҕолор уонна тус бэйэм ааппыттан тиэрдэбин.

диэн режиссер-туруорааччы, «Төлөн» оҕо тыйаатырын салайааччыта Марианна Кырбасова санаатын үллэһиннэ.

Кырачаан артыыстарга, салайааччыларга айар үлэҕитигэр үрдүк ситиһиилэри, сайдыыны баҕарабыт!