Бөтүҥ нэһилиэгин бибилэтиэкэтэ 75 сылын туолар үөрүүлээх күнүгэр И.Н. Корякин — Уйбаан Бөтүүнүскэй үтүө аата бибилэтиэкэҕэ иҥэрилиннэ.

Бүгүн  кулун тутар 3 күнүгэр Бөтүҥҥэ олус үөрүүлээх, долгутуулаах  уонна  ураты күн буолла. Ол курдук Амма улууһун Бөтүҥ нэһилиэгин бибилэтиэкэтэ 75 сыллаах үбүлүөйүн ону сэргэ  тумус туттар суруйааччыбыт Иван Никитич Корякин — Уйбаан Бөтүүнүскэй аатын бибилэтиэкэҕэ иҥэрэр үөрүүлээх тэрээһиҥҥэ дьон тоҕуоруһа муһунна.

Үбүлүөйгэ анаан кэлбит ыҥырыылаах ыалдьыттар, биир дойдулаахтарбыт бибилэтиэкэ үлэһиттэригэр үтүө санааларын анаан эҕэрдэ тыл эттилэр, бэлэхтэрин туттардылар.

75 сыл устата бибилэтиэкэ нэһилиэкпит духуобунай, култуурунай киининэн буолан кэллэ. Бөтүҥ  бибилэтиэкэтэ тэриллиэҕиттэн бүгүҥҥү күҥҥэ диэри үгүс киһи үлэлээн кэллэ. Ол курдук,  Семенов Михаил Андреевич, Онуфриев Семен Петрович, Адамова Дария Титовна, Дьяконов Василий Михайлович, Петрова Марина Лукинична, Павлова Альбина Васильевна, Аргунова Елена Ильинична, Пономарева Елена Александровна, Корякина Анна Семеновна, Слепцова Марина Никифоровна, Дьячковская Анна Степановна, Ефремова Ирина Петровна, Иванова Дария Ильинична, Лобанова Полина Петровна, Неустроева Надежда Афанасьевна, Неустроева Анна Авксентьевна, Бусаинова Мария Васильевна, Никитина Мария Дмитриевна, Игнатьева Мотрена Анастасовна, Иванова Евдокия Тунгаевна, Попова Энгельсина Алексеевна, Семенова Лия Афанасьевна, о.д.а.  Билигин Ая Николаевна Луковцева сүрүн бибилэтиэкэринэн, Сахаяна Гаврильевна  Гурьева бибилэтиэкэринэн үлэлии-хамсыы сылдьаллар.

Бүгүҥҥү долгутуулаах түгэҥҥэ Бөтүҥмүт киэн туттуута, бэйиэт, прозаик, ССРС, РФ суруналыыстарын сойууһун уонна СӨ суруйааччыларын сойууһун чилиэнэ, норуоттар икки ардыларынааҕы суруйааччылар сойуустарын түмсүүтүн чилиэнэ, СӨ бочуоттаах бэтэрээнэ, Сэбиэскэй эргиэн, СӨ бэчээтин, СӨ тыатын хаһаайыстыбатын туйгуннара, СӨ «Ытык аҕа», «Гражданскай килбиэн» ытык бэлиэлэр туһааннааҕа, «СӨ национальнай кинигэни таһаарыыга кылаатын иһин», «СӨ тыа сирин олоҕун сырдатыыга үтүөлэрин иһин», Василий Никифоров – Күлүмнүүр аатынан анал бэлиэлэринэн уонна Прокопий Караканов – Бурдук Буокай анал бириэмийэтин туһааннааҕа, «Кыһыл көмүс бөрүө» лауреата, Амма улууһун уонна Бөтүҥ нэһилиэгин бочуоттаах гражданина Иван Никитич Корякин – Уйбаан Бөтүүнүскэй аатын бибилэтиэкэҕэ иҥэрэр туһунан сүбэ мунньах быһаарыытын Амма улууһун депутаттарын сэбиэтин бэрэссэдээтэлэ Владимир Владимирович Колосов билиһиннэрдэ. Үөрүүлээх быһыыга-майгыга саҥа ааты арыйдылар Бөтүҥ нэһилиэгин тыа сирин түөлбэтин баһылыга Саргылана Васильевна Борисова, Күннүк Уурастыырап аатынан улуус кииннэммит бибилэтиэкэтин дириэктэрэ Прокопий Евгеньевич Прокопьев, бибилэтиэкэ дириэктэрин Ая Николаевна Луковцева уонна Иван Никитич олоҕун аргыһа Евдокия Семеновна Новикова.

Амма, Бөтүҥ нэһилиэктэрин уус-уран самодеятельнастарын кыттыылаахтара Иван Никитич суруйбут хоһооннорунан эҕэрдэ кэнсиэрдэрин көрдөрдүлэр, ол курдук «Төлөн» оҕо тыйаатырын уолаттара «Сэрии сылын оҕолоро» хоһоонун олус долгутуулаахтык аахтылар, Амматааҕы “Ыра санаа” ырыа ансаамбыла «Өйдүүбүн, ийэккээм, өйдүүбүн», «Ыллаа, ыллаа ыра санаа» ырыаларын сүрдээх истиҥник ыллаатылар, Амма мааны куоластара Анна Матвеева «Ньургуһун», Анфиса Федорова «Алаас сирэм хотуна» ырыалары ыллаан дьон сүрэҕин долгуттулар, Петр Ефремов «Дьоллоох буолуом оччоҕо» ырыаны бар дьонугар бэлэхтээтэ, кыыһа Анна күтүөтэ Афанасий Томскайдар аҕаларын айбыт хоһоонугар анаабыт дьүрүлэлэрин кыл-кырыымпаннан уонна баянынан киэргэттиллэр, кыргыттара Саргылана Мартынова, Ирина Олесова, Туйаара Андреева аҕаларыгар анаабыт хоһооннорун ис дууһаларыттан аахтылар, кыракый сиэн уола Семен Попов эһээтигэр анаан суруйбут хоһоонун бар дьонун ортотугар ааҕан иһитиннэрдэ,  сиэнэ Вилена Мартынова уонна Розалия Иванова «Аммам устан суһумнаа» ырыаны бэрт сэргэхтик толордулар, ыал саамай кыра кыыһа Саина Попова кэргэнинээн Константин Поповтуун уонна дьүөгэтинээн Любовь Лобановалыын дуэтынан ыллаан дьон-сэргэ сүргэтин көтөхтүлэр.

Ити курдук Иван Никитич Корякин – Уйбаан Бөтүүнүскэй аатынан Бөтүҥнээҕи бибилэтиэкэ 75 сыллаах үбүлүөйэ бэрт сэргэхтих, истиҥник ааспытыттан бары ыалдьыттар, тэрийээччилэр астынан-дуоһуйан тарҕастылар.

Уйбаан Бөтүүнүскэй аатын үйэтитэр бибилэтиэкэ аата үгүс ааҕааччылаах буолан өрүү сырдыкка-кэрэҕэ угуйа, билиигэ-көрүүгэ сирдии турдун! Кини олорбут олоҕо, айымньылаах үлэтэ үйэттэн үйэҕэ үүнэр көлүөнэ  ыччакка  үтүө холобур буола туруохтун.