Хоһууннары үйэтитэн, үгэстэри чиҥэтэн: Бөтүҥ нэһилиэгэр Аҕа дойдуну көмүскээччилэр күннэрэ

Олунньу ый бүтүүтэ, Аҕа дойдуну көмүскээччилэр күннэрин чэрчитинэн, Бөтүҥ нэһилиэгэр дьоһуннаах, үтүө үгэстэри чиҥэтэр хас да тэрээһин буолан ааста.

Олунньу 21 күнүгэр, Бөтүҥ орто оскуолатыгар олус суолталаах түгэн буолла. Анал байыаннай дьайыы кыттыылааҕа, «Хорсун быһыы» уордьанынан наҕараадаламмыт Василий Иванович Емельянов аатын үйэтитэр «Парта Героя» уонна мемориальнай табличка арылынна. Бу тэрээһин Василий Иванович хорсун быһыытын, төрөөбүт дойдутугар бэриниитин кэнэҕэски ыччакка сырдатар сыаллаах-соруктаах ааста.

Олунньу 23 күнүгэр, бырааһынньык үөрүүлээх тэрээһинэ Бөтүҥнээҕи С.Я. Левин аатынан норуот айымньытын киинигэр буолла. Тэрээһини алгыс тылларынан Василий Васильевич Кочаткин аста. Бу кэннэ, Бөтүҥтэн сылдьар анал байыаннай дьайыы кыттыылаахтарыгар анаммыт, дууһаны таарыйар видео уһулук көрдөрүлүннэ. Бу тэрээһиҥҥэ кинилэр төрөппүттэрэ уонна чугас дьонноро бааллара, ону таһынан Амматааҕы нэһилиэнньэ социальнай көмүскэлин кэлим кииҥҥэ сынньана сылдьар анал байыаннай дьайыы кыттыылаахтара уонна кинилэр төрөппүттэрэ кэлбиттэрэ ордук суолталаах буолла. Кинилэргэ Амма улууһун баһылыгын социальнай боппуруостарга солбуйааччыта Николай Александрович Ларионов Махтал суруктары туттарда.

Бу дьоһун күҥҥэ эҕэрдэ тыл эттилэр: «Бөтүҥ нэһилиэгэ» тыа сирин түөлбэтин баһылыга Саргылана Васильевна Борисова, Амма улууһун военкома Вячеслав Игоревич Маликов, Амма улууһун Ытык Сүбэтин бэрэссэдээтэлэ Василий Алексеевич Пахомов, анал байыаннай дьайыы кыттыылааҕа Роман Михайлович Филатов, Амматааҕы нэһилиэнньэ социальнай көмүскэлин кэлим киинин дириэктэрэ Софья Лаврентьевна Александрова. Кинилэр бары хорсун эр дьоннорбутугар махталларын тиэртилэр, чэгиэн доруобуйаны уонна эйэлээх олоҕу баҕардылар.

Тэрээһин биир умнуллубат түгэнинэн, Бөтүҥ нэһилиэгин эр дьонноругар анаан, кинилэр үйэлэргэ салҕанар дьулуурдарын, айылҕалыын алтыһыыларын, олоххо тардыһыыларын бэлиэтиир тимир ууһа Михаил Александрович Алексеев оҥорбут «Муус алларар анньыытын» туттарыыта буолла. Бу ытык бэлиэ Бөтүҥ нэһилиэгин спордун инструкторыгар Александр Александрович Артемьевка туттарылынна.

Мустубут дьону С.Я. Левин аатынан норуот айымньытын киинин иһинэн үлэлиир айар кэллэктииптэр, ырыа, үҥкүү ансаамбыллара, «Мичээр» уһуйаан иитиллээччилэрэ эҕэрдэлээтилэр. Тэрээһини саха төрүт үҥкүүтүнэн — оһуохайынан түмүктээтилэр.

Салҕыы бырааһынньык В.З. Неверов аатынан спорт уораҕайыгар ыытылынна. Манна Бөтүҥ нэһилиэгин дьахталларын сэбиэтэ, тэрилтэлэр, түөлбэлэр кэрэ аҥардара эр дьоннорго анаан бырааһынньыктааҕы остуолу тэрийдилэр. Бу кэнниттэн түөлбэлэр эр дьоннорун иһигэр ох саа ытыытыгар, теннискэ, саахымакка, дуобакка, корнхолга, дартска, баарыска «Многоборье» күрэҕэ ыытылынна. Күрэх түмүгүнэн: 4-с миэстэҕэ «Илин» түөлбэ, 3-с миэстэҕэ «Ситим» түөлбэ, 2-с миэстэҕэ «Арчы» түөлбэ, уонна 1-кы миэстэҕэ «Сомоҕо» түөлбэ таҕыстылар. Кыайбыт түөлбэ иһинэн бары көрүҥҥэ абсолютнай күрэх түмүгүнэн кыайыылааҕынан Гурьев Федор Викторович буолла.

Ытыктабыллаах дойдубут көмүскээччилэрэ, эр дьоннорбут! Эһигини Аҕа дойдуну көмүскээччилэр күннэринэн өссө төгүл итиитик-истиҥник эҕэрдэлиибин! Эһиэхэ чэгиэн доруобуйаны, уһун олоҕу, дьолу-соргуну, үлэҕитигэр-хамнаскытыгар үрдүк ситиһиилэри баҕарабыт. Эһиги – биһиги тирэхпит, эрэллээх эркиммит, тулхадыйбат тулааһыммыт буоларгытын умнуман! Эйэлээх халлаан анныгар, чэгиэн-чэбдик туруктаахтык, үлэҕитигэр-хамнаскытыгар ситиһиилээхтик олоруҥ!