«Оллооннуу туойдахпына»

Бүгүн, олунньу 13 күнүгэр, Бөтүҥ нэһилиэгэр Саха сиригэр култуура сылын, «Оллоон» Саха өрөспүүбүлүкэтин көрдөрүүлээх оҕо фольклорнай ансаамбылын төрүттээччитэ, Саха Өрөспүүбүлүкэтин култууратын, үөрэҕириитин туйгуна, Бөтүҥ нэһилиэгин бочуоттаах олохтооҕо, “Амма киэн туттуута”, «Саха Өрөспүүбүлүкэтин норуотун уус-уран айымньытын сайдыытыгар тус кылаатын иһин”, «Софья Сидорова аатынан» бэлиэлэр хаһаайына, Үлэ бэтэрээнэ Софронова Анисия Даниловна төрөөбүтэ 80 сылыгар, А. А. Черемных аатынан Амматааҕы оҕо искусствотын оскуолатын филиалын иһинэн үлэлиир «Оллоон» көрдөрүүлээх оҕо фольклорнай ансаамбыла тэриллибитэ 30 сылыгар, Ийэ тыл уонна сурук-бичик күнүгэр аналлаах бэрт сэргэх тэрээһиннэр буолан аастылар.

Күммүт сарсыарда Н.Е. Иванов аатынан Бөтүҥ орто оскуолатыгар үөрүүлээх линейканан саҕаланна. Бу дьоһун түгэҥҥэ «Бөтүҥ нэһилиэгэ» тыа сирин түөлбэтин баһылыга Борисова Саргылана Васильевна, Амма улууһун үөрэх дьаһалтатын салайааччытын солбуйааччыта Иванова Акулина Семеновна, Бөтүҥ орто оскуолатын дириэктэрэ Никитин Алексей Николаевич эҕэрдэ тыллары этэн, үөрэнээччилэри бырааһынньыгынан истиҥник эҕэрдэлээтилэр. Ол кэннэ илии илииттэн тутуһан оһуохайы оройуттан тутан, эһиэкэйи эҥээриттэн ылан линейканы уопсай оһуохайынан түмүктээтилэр. Оһуохайы «Оллоон» ансаамбыл биир бастыҥ выпускницата, Анисия Даниловна иитиллээччитэ Дарияна Яковлева таһаарда. 9 чаастан кылаастарынан олоҥхо истиитэ ыытылынна, оҕолор төрүт култуураҕа чугаһаатылар.

Эбиэт кэннэ, күнүс 2 чааска, А.А. Черемных аатынан Амматааҕы оҕо искусствотын оскуолатын филиалын иһинэн үлэлиир «Оллоон» көрдөрүүлээх оҕо фольклорнай ансаамбылын эҕэрдэ кэнсиэрэ буолла. Кэнсиэри «Оллоон» салайааччылара Дарияна Яковлева уонна Саха Өрөспүүбүлүкэтин култууратын туйгуна Саина Попова иилээн-саҕалаан, тэрийэн ыыттылар.

Кэнсиэр кэмигэр Амма улууһун үөрэх дьаһалтатын салайааччытын солбуйааччыта Иванова Акулина Семеновна «Оллоон» ансаамбыл иитиллээччилэригэр сайын Короленко турбазатыгар сынньана баралларыгар анаммыт путевканы үөрүүлээх быһыыга-майгыга туттарда. Бу эдэр талааннарга кэрэ бэлэх буолла.

Кэнсиэргэ «Оллоон» выпускниктара, иитиллээччилэрэ кытыннылар. Ол курдук, Айна Татаринова, Арылхан Нарыйаана, Надя Дьяконова, Дарияна Яковлева, Саина Попова, «Оллоон» ансаамбыл орто уонна улахан бөлөхтөрө, Июлита Лобанова, Мичийээнэ Дьячковскайа, Лейла Иванова, Эльмира Романова уонна Камила Иванова бэйэлэрин дьоҕурдарын арыйдылар, саха омук тыынын, фольклорун толору баһылаабыттарын, Анисия Даниловна үөрэҕэ, фольклор сайдыытыгар киллэрбит кылаата көлүөнэттэн көлүөнэҕэ бэриллэн иһэрин көрдөрдүлэр.

Бу күннээҕи тэрээһиннэр Анисия Даниловна Софронова олоҕун уонна үлэтин суолтатын өссө төгүл үрдэтэн, «Оллоон» ансаамбыл 30 сыллаах айар үлэтин көрдөрөн, Ийэ тыл уонна сурук-бичик ураты суолтатын дьон өйүгэр-санаатыгар хатаатылар. Бөтүҥ нэһилиэгэ төрүт култууратын харыстыырга уонна сайыннарарга күүскэ үлэлиирин көрдөрдө.