«Саллаат оҕото — Чооруона» Саха тыйаатырын сыанатыгар

Тохсунньу 29 күнүгэр Дьокуускай куоракка П.А. Ойуунускай аатынан Саха академическай тыйаатырын сыанатыгар Амма улууһун биир дойдулаахтарын Саҥа дьыллааҕы көрсүһүүтүн чэрчитинэн ураты түгэн буолан ааста. Бөтүҥ нэһилиэгин «Төлөн» оҕо тыйаатыра Иван Герасимович Иванов – Уйбаан Нуолур «Саллаат оҕото — Чооруона» диэн кэпсээнигэр олоҕуран өр сылларга саха тылын уонна литературатын учууталынан үлэлээбит РФ уопсай үөрэхтээһинин бочуоттаах үлэһитэ, СӨ үтүөлээх учуутала, СӨ үөрэҕин туйгуна, «Учууталлар учууталлара» Светлана Алексеевна Неустроева суруйбут сценарийынан туруоруллубут испэктээгин көрдөрдө.

Бу драматическай айымньы Аҕа дойду Улуу сэриитин ыарахан кэмнэригэр саха оҕото Чооруона уустук дьылҕатын, кини хорсун санаатын уонна ханнык да моһоллортон толлубат олоххо тардыһыытын арыйан көрдөрөр. Оҕолор итэҕэтиилээх оонньуулара көрөөччү дууһатын таарыйда. Кинилэр талааннара, улахан сыанаҕа үөрэхтээх артыыстартан хаалсыбаттык оонньуурга бэлэмнээхтэрэ кими барытын сөхтөрдө.

Бу испэктээк 2025 сыл муус устар ыйыгар Амма Бөтүҥэр сахалыы тылынан сүрэхтэммитэ. Онтон от ыйыгар Иркутскай уобаласка буолбут бүтүн Арассыыйа таһымнаах «Театральные каникулы на Байкале» фестивальга ыҥырыллан, нууччалыы тылбаастанан, киэҥ эйгэҕэ тахсыбыта. Ол курдук, Бөтүҥ оҕолорун талаана Байкал кытылыгар тиийэ биллибитэ. Оҕолор бу курдук ситиһиилэнэллэригэр алын сүһүөххэ кылаас салайааччытынан үлэлээбит Дьяконова Марта Константиновна уонна «Төлөн» оҕо тыйаатырын салайааччыта, режиссер-туруорааччы Кырбасова Марианна Семеновна үлэлэрэ сүҥкэн оруолу оонньоото. Кинилэр кыһамньылара, күүстээх үлэлэрин түмүгэ Саха тыйаатырын сыанатыгар үрдүк таһымҥа көһүннэ.

Бэлиэтээн эттэххэ, «Төлөн» оҕо тыйаатыра Амма улууһун Бөтүҥнээҕи Степан Левин аатынан норуот айымньытын киинин иһинэн үлэлиир «Дьулуур» норуот тыйаатырын спутнига буолар. Бу туруоруу биир уратытынан — киниэхэ биир кылаас кэллэктиибэ барыта түмүллэн кыттара буолар. Бу оҕолор доҕордуу буолууларын уонна биир сыаллаах-соруктаах үлэ түмүгэ төһө күүстээх буоларын туоһулуур.

Саха тыйаатырын курдук улахан сыанаҕа тахсыы — эдэр артыыстарга, Бөтүҥ нэһилиэгин култуурунай олоҕор умнуллубат түгэн уонна улахан ситиһии. Амма улууһун дьоно-сэргэтэ оҕолорун талааннарынан уонна Култуура сылын маннык үрдүк таһымҥа арыйбыттарынан киэн тутунна.