«Дьулуур» норуодунай тыйаатыр Хатаска

Муус устар 4-5 күннэригэр Хатаска үгэс буолбут «Битва режиссеров» өрөспүүбүлүкэтээҕи норуодунай тыйаатырдар күрэхтэригэр Бөтүҥнээҕи «Дьулуур» норуодунай тыйаатыр баран кыттыыны ылан кэллэ.

Бу күрэххэ Социалистическай Үлэ Дьоруойа, III ыҥырыыга Саха АССР Үрдүкү Сэбиэтин депутата, Саха АССР норуотун хаһаайыстыбатын үтүөлээх үлэһитэ, Амма улууһун бочуоттаах олохтооҕо, «XX үйэ чулуу киһитэ» анал бириэмийэ хаһаайына Анна Михайловна Васильева – Сэбиэт Аана төрөөбүтэ 110 сылыгар анаммыт «ҮЛЭ СУЛУҺА – СЭБИЭТ  ААНА» диэн музыкальнай испэктээгинэн кытыннылар. Бу испэктээк ситэн-хотон сыанаҕа турарыгар элбэх киһи үлэлэстэ. Ол курдук, тыйаатыр салайааччыта, туруорааччы  режиссер – МАРИАННА КЫРБАСОВА, испэктээк сценарийын суруйдулар – МАРИАННА КЫРБАСОВА, СВЕТЛАНА НЕУСТРОЕВА, ырыалары бэлэмнээтилэр – АННА ПОПОВА, САИНА ПОПОВА, үҥкүүлэри туруордулар – КОНСТАНТИН ПОПОВ, КҮННЭЙ НЕСТЕРЕВА, уоту туруорда – МАРИАННА КЫРБАСОВА, видеосюжеты оҥордо – АЙТАЛИНА ИВАНОВА, экран контена – СНЕЖАННА ЕГОРОВА, МИЧИЛ КЫРБАСОВ, костюмердар – СНЕЖАННА ЕГОРОВА, МАРИАННА БОРИСОВА, САРГЫЛАНА ЧАБЫКИНА, тыаһы-ууһу оҥордо – АНАТОЛИЙ ГУРЬЕВ, МАРИАННА КЫРБАСОВА, реквизиттэри, бутафориялары оҥордулар – КОНСТАНТИН ПОПОВ, ЗАХАР НИКИТИН, САХАЯР ЧАБЫКИН.
Оруолларга : Үҥкүүһүттэр – «МАХТАЛ» норуодунай үҥкүү коллектива Ырыаһыттар – «Күн Куо», «Одун Хаана» ырыа коллективтара Кырыымпаҕа, флейтаҕа оонньооччу – ПЕТР МАРКОВ Айыыһыт – РОЗА ИВАНОВА 1 өбүгэ – АННА ПОПОВА 2 өбүгэ – СВЕТЛАНА ТАРБАХОВА Аана ийэтэ – САХАЙААНА ГУРЬЕВА Аана аҕата – ВАЛЕНТИН ИВАНОВ Аана кэргэнэ Ванифадий – ЗАХАР НИКИТИН Кыра Аана оруолун толордулар «Дьулуур” норуодунай театр спутнига “Төлөн” оҕо тыйаатырын иитиллээччилэрэ: Кыракый Ааныска – САРГЫ ДЬЯЧКОВСКАЯ Орто Ааныска – ВЛАДА ПОПОВА Анна Михайловна – МАРИЯ ИВАНОВА Эдэр Ааныска – ДАРИЯНА ЯКОВЛЕВА оонньоотулар. Испэктээк сүрүн уратытынан биир дойдулаахтарбыт – суруйааччы, СССР, РФ суруналыыстарын, Норуоттар икки ардыларынааҕы, Саха Өрөспүүбүлүкэтин суруйааччыларын сойууһун чилиэнэ, Амма улууһун, Бөтүҥ нэһилиэгин бочуоттаах олохтооҕо – Иван Корякин – Уйбаан Бөтүүнүскэй хомоҕой хоһооннорунан, норуот тапталлаах ырыаһыта, ырыа айаааччыта, уопсастыбаннай диэйэтэл – Ольга Иванова-Сидоркевич, Саха Өрөспүүбүлүкэтин ускуустубатын үтүөлээх диэйэтэлэ – Аркадий Самойлов уонна Полина Макарова үйэлээх, уостан түспэт ылбаҕай ырыаларынан уонна норуот ырыаларынан тиһиллибитэ буолла.
Уопсайа Мэҥэ-Хаҥаластан, Чурапчыттан, Үөһээ Бүлүүттэн, Тааттаттан, Амматтан, Бүлүүттэн, Хаҥаластан 13 норуодунай тыйаатыр сыанаҕа тахсан араас жанрдаах испэктээктэри көрдөрдүлэр.

Түмүккэ «Дьулуур» норуодунай тыйаатыр «Лучшая работа художника по костюмам» диэн анал ааты ылла. Бөтүҥ нэһилиэгин киэн туттар кэлэктиибэ, «Дьулуур» норуодунай тыйаатырбыт күрэххэ ситиһиилээхтик кыттан кэлбитинэн эҕэрдэлиибит!

Эһиги бу ситиһиигит — уһун күннээх репетициялар, сыралаах үлэ, сценаҕа бэриниилээх буолуу үтүө түмүгэ. Хас биирдии артыыс ис иэйиитэ, режиссер сонун көрүүтэ, кэлэктиип түмсүүлээх буолуута — бу барыта өрөспүүбүлүкэ таһымнаах үрдүк ситиһиигэ тиэртэ.

Эһиги үлэҕит — биһиги нэһилиэкпит, улууспут култууратын киэргэлэ. «Дьулуур» норуодунай тыйаатыр саҥаттан-саҥа испэктээктэринэн көрөөччүлэри сөхтөрө, үөрдэ турдун!