Улуу Кыайыы үйэлээх кэрэһитэ – сүрэхтэргэ сүппэт!

«Сүгүрүйэбит! Киэн туттабыт! Махтанабыт!» диэн ытык тыллары тутуһан, ыам ыйын 8 күнүгэр Бөтүҥ нэһилиэгин олохтоохторо Улуу Кыайыы 81 сылын бэлиэтиир миитиҥҥэ түмүстүлэр. Кыайыы болуоссатыгар ыытыллыбыт үөрүүлээх тэрээһин норуот сомоҕолоһуутун, өбүгэ үтүө үгэһигэр бэриниитин чаҕылхайдык көрдөрдө.

Тэрээһин «Өлбөт үйэлээх полк» сэлэлии хаамыытынан саҕаланна. Аҕа дойду Улуу сэриитин хорсун буойуттарын хаартыскаларын өрө тутан кэнчээри ыччаттан кырдьаҕаска диэри бары биир сомоҕо буолан хорсун дьоммут сырдык ааттарын үйэтитиигэ кыттыстылар.

Миитиҥ кэмигэр юнармеецтар, нэһилиэк тэрилтэлэрин салайааччылара, тыыл уонна үлэ ветераннара, сэрии сылын оҕолоро “Кэриэстэбил кытыастар төлөнүгэр” өйдөбүнньүк гирляндаларын уонна сибэкки дьөрбөтүн ууран сэрии хонуутугар охтубуттарга, тыылга күүрээннээхтик үлэлээбиттэргэ сүгүрүйдүлэр. Хорсун буойуттарбыт кэриэстэригэр Чуумпуруу тохтобула биллэриллибитэ дьон сүрэҕин-быарын долгутта.

Бөтүҥ нэһилиэгиттэн Улуу сэриигэ 138 киһи ыҥырыллыбытыттан 67 киһи төннүбэтэҕэ, 71 киһи Кыайыыны аҕалсыбыта дьоҥҥо-сэргэҕэ санатылынна. Нэһилиэк баһылыга Саргылана Васильевна Борисова, ветераннар сэбиэтин салайааччыта Тамара Прокопьевна Давыдова уонна тыыл ветерана Афанасий Егорович Борисов эҕэрдэ тылларын эттилэр.

Кыайыы өрөгөйдөөх күнүнэн «Сайдыс 2026» культурнай-спортивнай күрэхтэһии чэрчитинэн тэрилтэлэр икки ардыларыгар ырыа күрэҕэ ыытылынна. Кыттааччылар Аҕа дойду Улуу сэриитин кэмигэр айыллыбыт ырыалары биирдиилээн уонна дуэтынан толорон дьон сүргэтин көтөхтүлэр. «Хайыһар», «Аҕам суруктара», «Сэттэ кут туруйа», «Алёша» уонна да атын ырыалар тыастара Кыайыы скверин толордо. Ону тэҥэ, Бөтүҥнээҕи «Мичээр» уһуйаан оҕолоро «Эйэ дьол иһин» ырыаны ыллаатылар.

Күрэх кэнниттэн Бөтүҥ орто оскуолатын 7-с кылааһын үөрэнээччилэрэ көрдөрүүлээх байыаннай хаамыыны оҥорбуттара дьону-сэргэни сөхтөрдө.

Күрэх түмүгүнэн, биирдиилээн ырыаһыттарга уонна дуэттарга миэстэлэр уонна анал ааттар туттарылыннылар. Биирдиилээн ырыаһыттарга «Кэрэхсэбиллээх ырыаһыт» анал аат Олег Егоровка, «Ураты көстүүлээх ырыа» анал аат Ая Луковцеваҕа туттарылыннылар, 3-с миэстэҕэ — Наталья Окорокова, 2-с миэстэҕэ — Розалия Иванова, 1-кы миэстэҕэ — Ирина Олесова таҕыстылар.
Дуэтынан ырыа хайысхатыгар «Көрөөччү биһирэбилэ» анал аат Айна Алексееваҕа, Снежанна Егороваҕа, «Ийэиилээх ырыа» анал аат Анна Поповаҕа, Дарияна Яковлеваҕа туттарылыннылар,
3-с миэстэҕэ — Светлана Тарбахова, Мария Никитина, 2-с миэстэҕэ — Татьяна Окоемова, Спартак Васильев, 1-кы миэстэҕэ — Дмитрий Григорьев, Федот Платонов таҕыстылар.

Улуу Кыайыы күнэ – бу эйэлээх халлаан анныгар дьоллоох олохпут төрүтэ! Бу ытык күн, үйэлэргэ умнуллубат кэрэ бэлиэтээһин буолан, биһигиэхэ эйэлээх халлааны бэлэхтээбиттэргэ махталбытын биллэрэр эрэ буолбакка, саҥа кыайыыларга, үүнүүгэ-сайдыыга дьулуурбутун күүһүрдэр. Бөтүҥ нэһилиэгэ өрүү үлэҕэ, сайдыыга уонна чөл олоххо бастыҥ холобур буола турдун, кэнэҕэски ыччата эйэлээх ыраас халлаан анныгар дьоллоохтук олорон, улууспутун уонна дойдубутун өссө да үрдүк чыпчаалларга сирдиэхтин!