Уйгулаах сайыны уруйдуу көрүстүбүт
Ыам ыйын 22 күнүгэр — айылҕа чэлгийэр кэмигэр, самаан сайыны уонна быйаҥнаах илгэни көрсөр Ньукуолун күнэ Маҥхааһай алааһыгар бэлиэтэннэ. Чаҕылхай күннээх, ыраас халлааннаах сайыҥҥылыы итии күҥҥэ ытык ыалдьыттарбыт — Бөтүҥ нэһилиэгин аҕам саастаах дьоно уонна ыаллыы сытар Чапчылҕан нэһилиэгин үһүс көлүөнэ «Күбэйэ» түмсүүтэ ыалдьыттыы кэлэн бырааһынньык үөрүүтүн өссө үрдэттилэр.
Сарсыарда 11 чаастан тэрээһин үөрүүлээх аһыллыытынан саҕаламмыта. Эҕэрдэ тылларын «Бөтүҥ нэһилиэгэ» тыа түөлбэтин баһылыга Саргылана Васильевна Борисова, «Чапчылҕан нэһилиэгэ» тыа түөлбэтин баһылыгын солбуйааччыта Уваров Афанасий Васильевич уонна Чапчылҕан нэһилиэгин бэтэрээннэрин түмсүүтүн бэрэссэдээтэлэ Марфа Анатольевна Ким-Ир-сен эттилэр. Кинилэр бары кэлбит дьону самаан сайын үүммүтүнэн эҕэрдэлээн, чэгиэн доруобуйаны, дьолу-соргуну баҕардылар.
12 чааска мустубут дьону алгыстаах алаадьынан уонна Байанай тойон маанылаабыт кус миининэн күндүлээтилэр. Остуол хотойорунан тардыллыбыт сахалыы аһылыктан дьон дуоһуйа аһаатылар, күүс-уох ылыннылар. Тэрээһини Ольга Трофимовна Николаева көрдөөх оонньууларынан сэргэхситтэ.
Күндүлээһин кэнниттэн 13 чаастан араас көрдөөх-нардаах оонньуулар дьону-сэргэни тартылар. Эбиэт кэннэ Чапчылҕан уонна Бөтүҥ нэһилиэктэрэ икки бөлөҕүнэн арахсан хамаандалары туруоран күрэхтэстилэр. Бу күрэхтэһии түмүгүнэн тэҥнэһии буолла. Оҕоттон кырдьаҕаска тиийэ бары кыттыһан, күлэн-үөрэн, сынньалаҥ кэми сэргэхтик атаардылар.
Маҥхааһай алааһа Ньукуолун күнүгэр дьолунан, үөрүүнэн-көтүүнэн уонна сылаас кэпсэтиинэн туолбута. Бу күн дьон сүргэтэ өрө көтөҕүлүннэ, кэлбит ыалдьыттар дуоһуйа сынньанан, саймаархай сайыны көрсөн астынан тарҕастылар.
Улуу Кыайыы үйэлээх кэрэһитэ – сүрэхтэргэ сүппэт!
«Сүгүрүйэбит! Киэн туттабыт! Махтанабыт!» диэн ытык тыллары тутуһан, ыам ыйын 8 күнүгэр Бөтүҥ нэһилиэгин олохтоохторо Улуу Кыайыы 81 сылын бэлиэтиир миитиҥҥэ түмүстүлэр. Кыайыы болуоссатыгар ыытыллыбыт үөрүүлээх тэрээһин норуот сомоҕолоһуутун, өбүгэ үтүө үгэһигэр бэриниитин чаҕылхайдык көрдөрдө. Тэрээһин «Өлбөт үйэлээх полк» сэлэлии хаамыытынан саҕаланна. Аҕа дойду Улуу сэриитин хорсун буойуттарын хаартыскаларын өрө тутан кэнчээри ыччаттан кырдьаҕаска диэри бары биир […]
Оҕо көмүскэлин күнэ Бөтүҥ нэһилиэгэр
Бэс ыйын 1 күнүгэр С.Я. Левин аатынан норуот айымньытын киинигэр Аан дойдутааҕы Оҕо көмүскэлин күнүгэр уонна самаан сайын кэлбитигэр анаммыт «Оҕо саас эйгэтэ» диэн кэрэ-бэлиэ тэрээһин ыытылынна. Тэрээһиҥҥэ НАК режиссера Марианна Семеновна Кырбасова култуура эйгэтигэр ситиһиилэммит, тэрээһиннрэгэ көхтөөхтүк кыттыбыт оҕолору бэлиэтээн эҕэрдэлээтэ, махтал суруктары туттарда. Иван Корякин – Уйбаан Бөтүүнүскэй аатынан олохтоох библиотека көҕүлээһининэн ыытыллыбыт […]
Комментарии (0)