Бөтүҥ бастыҥ балыксыттара: «Подледка-2026» күрэх түмүктэрэ

Бэҕэһээ, муус устар 19 күнүгэр, Бөтүҥ нэһилиэгэр муус аннынан кыһыҥҥы балыктааһыҥҥа тус бэйэни тургутан көрөр күрэх буолан ааста. «Бөтүҥ нэһилиэгэ» тыа сирин түөлбэтин дьаһалтата, Н.Е. Иванов аатынан Бөтүҥ орто оскуолатын Аҕа сэбиэтин көҕүлээһиннэринэн тэриллибит сэргэх тэрээһиҥҥэ балыксыт дьоҕурдаах бары баҕалаах дьон көхтөөхтүк кытыннылар.

Саамай үөрүүлээх уонна сэргэх түгэнинэн — күрэххэ оҕолор кыттыылара буолла! Өбүгэбит дьарыгын кыра саастарыттан утумнаан, мууһу дьөлө тэһэн, балык хабыытыгар араас ньымалары, албастары баһылыыллара көрүөххэ олус астык.

Күрэх кыттыылаахтара түөрт бөлөххө арахсан кииристилэр. Уопсай түмүккэ 1-4 кылаас үөрэнээччилэригэр соҕотох бэйэтэ эрэ балык хабан 1 миэстэҕэ Никулин Эрсан таҕыста. 5-11 кылаас үөрэнээччилэрин бөлөҕөр ким да балык хаппата. 18-50 саастаахтарга 1 миэстэ — Билюкин Борис, 2 миэстэ — Васильев Спартак, 3 миэстэ — Окоемов Прокопий буоллулар. 51 саастарыттан үөһэ саастаахтарга 1 миэстэҕэ — Давыдов Рудольф, 2 миэстэҕэ — Егоров Дмитрий, 3 миэстэҕэ — Семёнов Степан таҕыстылар. Никулин Эрсан «Бастакы балык», Давыдов Рудольф «Саамай улахан балык» анал ааттарынан наҕараадаланнылар. Мустубут дьон бары да кэриэтэ илии тутуурдаах, бириистээх тарҕастылар.

Тэрээһини өйөөбүт уонна бириис туруорбут спонсордарга Иванов Николайга, Олесова Майя5а, «Центр» маҕаһыыҥҥа, «Харысхан» маҕаһыыҥҥа, «Чараҥ» маҕаһыыҥҥа, «Бөтүҥ» тыа хаһаайыстыбатын кооперативыгар, Н.Е. Иванов аатынан Бөтүҥ орто оскуолатыгар, Бөтүҥ нэһилиэгин дьаһалтатыгар барҕа махталбытын тиэрдэбит!

Балыктааһын — көннөрү аһылык булунуу эрэ буолбакка, киһини тулуурдаах буоларга, айылҕалыын алтыһарга үөрэтэр ураты дьарык. Күрэххэ кыттыбыт бары балыксыттарга, ордук эдэр көлүөнэҕэ, ситиһиини баҕарабыт! Байанайгыт өрүү бэрсэ турдун!