«ҮТҮӨ САНАА ТҮҺҮЛГЭТЭ»

Муус устар 15 күнүгэр Ф. Потапов аатынан Амматааҕы норуот айымньытын дьиэтигэр анал байыаннай дьайыы кыттыылаахтарын, кинилэр дьиэ кэргэттэрин уонна доруобуйаларынан хааччахтаах дьону, спортсменнары Бөтүҥнээҕи «Күөх ыллык» эмтиир-чэбдигирдэр кииҥҥэ эмтиир, сынньатар усулуобуйаны тупсарарга аналлаах «Үтүө санаа түһүлгэтэ» диэн киэҥ далааһыннаах тэрээһин буолан ааста.

Күнүс 3 чааска атыы-эргиэн дьаарбаҥкатыгар дьон-сэргэ тоҕуоруһа муһунна. Манна Бөтүҥ нэһилиэгин олохтоохторо ас эгэлгэтин, соҕотуопка арааһын, илии оҥоһугун атыыга таһаардылар. Урбаанньыт Майя Олесова амма сэлиэһинэйиттэн бэйэтэ оҥорон таһаарар бурдуга, ол бурдуктан оҥоһуллубут лэппиэскэлэрэ дьон сэҥээриитин ылла.

Киэһэ 7 чааска Бөтүҥ нэһилиэгин айар талааннаахтарын эҕэрдэ кэнсиэрэ буолла. СӨ үлэҕэ уонна социальнай сайдыыга министерствотын Амматааҕы нэһилиэнньэ социальнай көмүскэлин кэлим киинин салайааччыта Сахаяна Тарасовна Неустроева, Амма улууһун Ытык сүбэ мунньаҕын бэрэссэдээтэлэ Василий Алексеевич Пахомов, «Күөх ыллык» эмтиир-чэбдигирдэр киин салайааччыта Софья Лаврентьевна Александрова эҕэрдэ тылларынан тэрээһини саҕалаатылар.

Кэнсиэргэ «Күөх ыллык» киин үлэһиттэрэ бэйэлэрэ кыттыыны ылан дьоҥҥо үтүө холобуру көрдөрдүлэр. «Махтал» норуодунай үҥкүү ансаамбыла, «Күн Куо» ырыа бөлөҕө, Егор Никифоров, Ньургуйаана Сутакова, Майя Александрова курдук дьоҕурдаах дьон сыанаҕа тахсан көрөөччү сүргэтин өрө көтөхпүттэрэ. Людмила Лобанова толоруутугар «Толуу астаах туораҕым», Ильяс Заровняев ыллаабыт «Хотугу сулус», «Улахан ыһыах» ырыалара, Ирина Олесова хоһоонноро — бу барыта биир санааҕа түмсүү күүһүн көрдөрдө. Онтон «Күөх ыллык» үлэһиттэрэ «Сиидэс муодата» диэн коллекцияларын көрдөрөн, дьону сөхтөрдүлэр. Түмүккэ «Махтал» ансаамбыл «Ковбой үҥкүүтэ» уонна атын да уран нүөмэрдэр кэнсиэри олус киэргэттилэр.

Бу тэрээһин биһиги дьоммут-сэргэбит түмсүүлээх, үтүө санаалаах буолан уустук кэмҥэ бэйэ-бэйэбитигэр өйөбүл буоларбытын өссө төгүл бигэргэттэ.

«Үтүө санаа түһүлгэтигэр» кыттыбыт, күүс-көмө буолбут сырдык ыраас санаалаах көрөөччүлэрбитигэр, кыттааччыларбытыгар барҕа махталбытын тиэрдэбит!

Үтүө санаа үтүөнү аҕаллын!