Оҕо көмүскэлин күнэ Бөтүҥ нэһилиэгэр

Бэс ыйын 1 күнүгэр С.Я. Левин аатынан норуот айымньытын киинигэр Аан дойдутааҕы Оҕо көмүскэлин күнүгэр уонна самаан сайын кэлбитигэр анаммыт «Оҕо саас эйгэтэ» диэн кэрэ-бэлиэ тэрээһин ыытылынна.

Тэрээһиҥҥэ НАК режиссера Марианна Семеновна Кырбасова култуура эйгэтигэр ситиһиилэммит, тэрээһиннрэгэ көхтөөхтүк кыттыбыт оҕолору бэлиэтээн эҕэрдэлээтэ, махтал суруктары туттарда.

Иван Корякин – Уйбаан Бөтүүнүскэй аатынан олохтоох библиотека көҕүлээһининэн ыытыллыбыт «Хаартыска нөҥүө — норуоттар доҕордоһууларыгар» хаартыска күрэҕин муҥутуур кыайыылааҕын Айаана Иванованы салайааччы Ая Николаевна Луковцева эҕэрдэлээтэ.

Салҕыы оҕолорбут талааннарын көрдөрөр тэттик кэнсиэр буолла. Сыанаҕа Лена Артемьева «Үрүмэччи» ырыанан сэргэхситиини саҕалаата. «Мичээр» уһуйаан выпускниктара сахалыы намыын үҥкүүнэн дьону-сэргэни үөрдүбүттэрэ. Олохтоох ырыа күрэхтэрин хас да төгүллээх лауреаттара Леня Яковлев «Кустукчаан», Айаана Иванова «Сайын» ырыаларынан көрөөччүлэр сүрэхтэрин долгуттулар. Сахалыы хомус дьиэрэҥкэй дорҕоонноро «Оллоон» бөлөх толоруутугар, Камилла Иванова хомуска оонньуута оҕо көмүскэлин күнүн ураты өйдөбүллээх оҥордо. Селена Степанова «Аҕам уруһуйа» ырыата уонна Алеша Егоров «Үчүгэйгэ үөрэн» ылбаҕай ырыата дьону-сэргэни умсугуппуттара. «Махтал» народнай үҥкүү ансаамбылын иитиллээччилэрэ ковбойскай үҥкүүнэн дьон ытыс тыаһыгар тиксэннэр, киэһэни өссө сэргэхситтилэр.

Кэнсиэр кэнниттэн оҕолор фойеҕа «Мичээр» уһуйаан иитээччилэрэ тэрийбит көрдөөх оонньууларыгар уонна аттракционнарыгар күүскэ кытыннылар. Ону таһынан, бу соторутааҕыта эрэ сүрэхтэммит «Мэхээлэчээн булчут» киинэни буор босхо көрдүлэр.

Маны сэргэ «Сайдыс — 2026» култуурунай-спортивнай күрэх иһинэн тэрилтэлэр икки ардыларыгар фотозона күрэҕэ буолан ааста. Түмүккэ, бастакы мисэтэ — «Күөх ыллык» эмтиир-чэбдигирдэр киин, иккис миэстэҕэ — «Мичээр» оҕо сайдар киинэ, үһүс миэстэҕэ — Н.Е. Иванов аатынан Бөтүҥ орто оскуолата уонна «Саамай солун оҥоһуулаах фотозона» анал ааты С.Я.Левин аатынан НАК уонна «Бөтүҥ нэһилиэгэ» тыа түөлбэтин администрациятын холбоһуга буолла.

Бары оҕолорго дьоллоох оҕо сааһы, чаҕыл күннээх ыраас халлааны баҕарабыт!